ප්‍රේම ගීත විරහ ගීත ආදී වශයෙන් කොතෙකුත් නම් ගීත මේ වන විට අප අසා ඇතිද? රසවිඳ ඇතිද? කෙසේ වෙතත් මිනිසෙකුගේ සංවේදී චිත්ත ස්භාවයක් සෘජුවම ස්පර්ශ කල හැකි සාර්ථකම මාධ්‍ය ලෙස මා දකින්නේ ගීතය නම් වූ සියුම් මියුරු පහසයි. තවද ගීතයක රස වින්දනය උපරීම කිරීම සඳහා ගායකයාගේ දායකත්වය හා සංගීතයේ රසමුසුව පමනක් ප්‍රමානවත් වනවා යැයි මා සිතන්නේ නැත. ඇතැම් විට ගීතයේ පද වැලට උරුමකම් කියන කථා මූලය දන්නේ නම් එය තවත් රසය උපරිම කරනු ඇත. එලෙසින්ම පද වැල තුල යෙදෙන උපමා, උපමේය, ව්‍යංගය තුල ගීතයේ රසය ඔප් නැන්වීමට දක්වන්නේ නොමද සහයකි.
එක්තරා ගමක පාසල් වියේ පසුවන නව යොවුන් වියේ සිසුවෙක් හා සුසුවියක් වෙයි. ඔවුන් අතර පාසල තුලදීම යම් පෙම් සබඳතාවක් ගොඩ නැඟෙයි. පෙම්වතා ගැන කියන්නේ නම් ඔහු ප්‍රසන්න පෙනුමැති නමුත් යම් යම් අග හිඟ කම් වලින් පෙලෙන පවුලක අයෙකි. පෙම්වතිය සාමාන්‍ය පවුලක ඉගෙනීමෙහි දක්ශ රූමත් තරුණියකි. කෙසේ නමුත් ඔවුන්ගේ මේ ප්‍රේම වෟතාන්තයේ පෙම්වතිය සරසවි වරම් ලබා ගනී. තරුණ පෙම්වතා ඔහුගේ අග හිඟ කම් මැද පාසල් දිවිය හමාර කරයි. ඔහු රැකියාවක් සොයා යයි. ඔහුට ලැබෙන්නේ මාර්ග සංවර්ධන කොන්ත්‍රාත් සමාගමක කම්කරු වෘර්තියකි. දිනක් තම කටයුතු වල නියැලී සිටින අතර තුර මේ තරුණයා හට තමන් පෙමින් බැඳුනු පෙම්වතිය දකින්නට යෙදෙයි. ඒ තනිව නොවෙයි. ඒ වෙනත් ජේත්තුකාර තරුණයෙකු හා වෙලී මොටසයිකලයක නැඟී ඔහු අසලින් යන අයුරුයි. මේ දුප්පත් තරුණයා ඔබ යැයි මදකට ඔබේ සිත තුල ආරූඩයක් ගොඩ නඟා ගත හොත් ඔබට දැනෙන්නේ කොයි වගේ හැඟීමක්ද? ඉතින් කොයි හැටි වෙතත් මා දන්නා තරමින් රත්නර්‍ශී විජේසිංහයන්ටද මේ ගීතයට පාදක වන්නේ මේ සිදුවීමයි.
අජානීය ස්කූටර් තුරඟා පිට වඩිනා..
කුමාරියන් වාත වේගයෙන් ඉගිලෙනු කොතැනා..
බදා හිමි දෙවුර එසැවී පුරවර සිරි බලනා..
විලාසයට නුඹේ කිරුල බිම වැටෙයිද සිතුනා..
කුමාරියන් වාත වේගයෙන් ඉගිලෙනු කොතැනා..
බදා හිමි දෙවුර එසැවී පුරවර සිරි බලනා..
විලාසයට නුඹේ කිරුල බිම වැටෙයිද සිතුනා..
මේ දුප්පත් පෙම්වතා තමන් පෙම් කල ප්‍රේමවන්තිය වෙනත් ජේත්තුකාර තරුණයෙකු හා වෙලෙමින් ඉතා වටිනා කියන යතුරුපැදියක නැඟි පවනට බඳු වේගයෙන් ඔහු අසලින් යනු දකී. එවිට මේ අව්‍යාජ පේමවන්තයාගේ සිතෙහි නැඟෙන සිතුවිලි ස්භාවය මේ තුල ඉදිරිපත් කරයි. තවද ගීතයේ මුල් කොටසේ දෙවන පද දෙක තුල ගීතයේ මුළු හරයෙන් හරි අඩක්ම කියවෙන බව මට හැඟෙයි.
බදා හිමි දෙවුර එසැවී පුරවර සිරි බලනා..
විලාසයට නුඹේ කිරුල බිම වැටෙයිද සිතුනා..
අප සිංහල ජන සමාජයේ සංකර සිරිත් විරිත් වල ඒ හැටි හුරුවක් නැත. විශේෂයෙන්ම ගැහැනු ලමයෙකු විවාහයකට ප්‍රම හැසිරිය යුතු ආකරයක් ඇත. එ් ලෙසින්ම විවාහයට පෙර ගැහැනු ලමයෙකුට කිරුලක් වන්නේ ඇගේ පවිත්‍ර බවයි. එම කිරුල ඇගෙන් විවාහයට පෙර ගිලිහෙනවා නම් ඇය කෙරෙන් කිරුල හිමි කුමරියකගේ වටිනා කම ගම්‍ය වන්නේ නැත. ඒ බව මේ තුල මනාව ඉදිරිපත් වන බව මගේ හැඟීමයි.
සූසැට ශිල්පයකු ගෙනා පාරගතව ගියෙනා..
පාරේ වැඩට හවුල් වෙන්න උදැල්ල මට ලැබුණා...
මා ගත දා බිදු හදුනා හදේ සිනා නගනා..
ප්‍රේමවන්ති විලවුන් ගෑ ලේන්සුපට සිඹිනා.
මේ අව්‍යාජ දුප්පත් පෙම්වතා, ඔහු අසලින් යන ඔහුගේම පෙම්වතිය දෙස බලන්නට වෙයි. ඔහු ඇයට සැබැවින්ම පෙම් කල අයෙකු වුවත් මේ වෘතාන්තය තුල ඔහුට හිමි වන්නේ මහ පාරේ දුක් විඳිමින් ඇය වෙනත් තරුනයෙකු හා පාන අනඟ රැඟුම් දැකීමටය. කෙසේ නමුත් දුප්පත් පෙම්වතා දකින මේ තරුණිය ඇගේ විලවුන් තැවරූ ලේංසුව ගෙන මුව මඩල වසා ගනී. එය ඔහු දකින්නේ සරදමක් ලෙසිනි. ඇතැම් විට ඇය උත්සාහ කරන්නේ මේ අවිහිංසක ප්‍රේමවන්තයාගේ නෙතු වලින් දැල්වෙන අකලංක ආදරයේ ගිනි පුපරු මඟ හැර යාමටදෝ යැයි වරෙක මට සිතෙයි.
සදාකල්ම පෙම්වතුන්ගේ සිහින පුරා පිපෙනා..
උදුම්බරා මලක් තියේ ආදරයයි කියනා..
රෑ තුන්යම සුවද උලා උදෑසනින් වැකෙනා..
කාට අහිමි උනත් සාධු මල් පිපියන් සැමදා...
ඔබ උදුම්බරා නැමති මල් විශේෂය ගැන අසා තිබෙනවාද? බොහෝ කලා කරුවන් ප්‍රේමයේ අර්ථ දැක්වීම් වලදී උදුම්බරා මල උපහැරනයක් කොට ගනී. මේ සුදු පැහැති උදුම්බරා පුශ්පයේ සුවිසේශී බව වන්නේ එහි ඇති අතිශය දුර්ලභ බවයි. මෙහිද පිවිතුරු ප්‍රේමය උදුම්බරා මලකට උපමා කර පෙන්වන්නේ ඒ නිසාමයි. එලෙසන්ම යම් දුකකක් සිත් තැවුලක් ඇති වූ විට “අනේ මට වගේ දුකක් තව කෙනෙක්ට නොවේවා“ යැයි කියන ගතියක් අපේ සිංහල මිනිසුන් අතර ඇත. මෙම ගීතයේද එවන් හැඟුමක් මේ තරුණයාගේ සිත තුලින් නැඟී එයි. තුන් යම රෑ පුරාවට කොහේ හෝ ලැගුම් හලක රාගයේ සුවඳ ගත තවරා උදෑසන වන විට පෙම් සුවඳ සිතින් වියැකි යන ප්‍රෙයා්ගකාරී ආදරවන්තයින් යැයි හුවා දක්වන අයට නොවෙයි, සැබෑ ආදරය නම් උදුම්බරා මලෙහි සුවඳ හඳුනන ප්‍රේම වන්තයන් උදෙසා තවත් උදුම්බරා මල් පිපියන් යැයි ඔහු ප්‍රාර්ථනා කරනවා වැනිය.
කෙසේ වෙතත් මේ අපූරු ගීතයේ පද රචනය රත්න ශ්‍රී විජේසිංහ මහතා අතිනි. සංගීතය රෝහන වීරසිංහයන්ගෙනි. මියුරු හඬ කරුනාරත්න දිවුල්ගනේ මහතාගෙනි.
ගීතය වෙත.
https://www.youtube.com/watch?v=fNgHgJY5u2o
