ඇත්තෙන්ම මෙම ගීතය ඉතා මෑතකදී අහම්බෙන් මෙන් මා සවනත වැකුනු සොඳුරුතම ගීයකි. ඇසූ ප්‍රථම වර වුවද සුනිල් ආරියරත්නයන් අතින් නිමැවුනු එහි පද වැල හා නන්දාමාලිනී මහත්මියගේ භාවාත්මක සුගායනය මා සිතෙහි ඇතිකලේ ශෝඛි රසය මුසු ප්‍රකම්පනයක් යැයි කිවහොත් එය අතිශෝප්තියක් නොවෙයි.
එසේම මේ තුල මතු කෙරෙන අන්තර්ගතය තුල තමන් අතින් සිදුවූ වරදක් හේතුවෙන් මංගල දිනය දා අසරණ වන යුවතියකගේ ආත්මීය වැලපීම විදහා දක්වයි,
හෙවණැලි ද ඉකි බිඳී ගණ අඳුරේ
ගහකොළ ද පණ අදී බිම වැතිරී
අභය ඉල්ලා යදින්නී ඈ
ආලයේ නාමෙන්
ඝන අඳුර තුල සෙවනැලි නම් කොහි තිබිය හැකිද? නමුත් මේ තුල කියාපානු ඇත්තේ මා පෙර කී යුවතියගේ, අතීතය නම් අඳුර තුල සැඟව ගිය සෙවනැලි වන් ස්මරණයන්ගේ වර්ථමාන විලාපය නොවියහැකිද. එසේම එවන් අවස්ථාවක ස්භාවධර්මයේ ගහකොල පවා බිම වැතිර පණ අදිමින් මේ මතුකරලන්නේ ඇගේ සසල වූ සිතෙහි වන අති මහත් පිඩාවේ ස්වරූපය නොවෙයිද. මෙවන් මොහොතක ඇය සිය ස්වාමීයාගෙන් අභය ඉල්ලනවා හැර අන් කුමක් නම් කරන්නද "සෙවනැලි පවා ඉකි බිඳ හඩන, ගහ කොල පවා කම්පිතව සසල වන." ඇත්තෙන්ම, මංගල දිනය තුල එවන් ඛේදනීය ඉරණමක හිමිකාරියක වන යුවතියකගේ ආත්මීය වැලපීම විදහා පාන්නට මෙතරම් සංවේදී ආරෝපනයන් තවත් නම් විය හැකිද? සුනිල් ආරියරත්නයන්ගේ සුවිශේශීත්වයද එයම වේ.
ගිරි හිසින් උදා වූ මධු සඳ බැස යයි
වන හිසින් නැගී ආ පිළි රැවු වියැකෙයි
මුණින් තලාවේ සුධවල යහනත
තැවෙන්නී ඈ . . . ආලයේ නාමෙන්
"ගිරි හිස සිප උදා වන මධු සඳක්, වන හිස සිසාරා ආ පිළි නදක්," නියත ලෙසම මේ ආරෝපනයන් තුල මනස තුල චිත්‍රනය කරන චිත්ත රූප අතිශය ප්‍රසන්නය. එසේම ප්‍රේමණීය වේ. නමුත් ඇගේ ජීවිතය තුලින් මේ කියන්නා වූ විචිත්‍රවත් බව වියැකී යමිනි. ස්වේත වර්ණිත මංගල යහන මත සොවින් තැවෙනා ඇයට ප්‍රේමයේ නාමයෙන් එක් වූ මැකිය නොහැකි අඳුරු සලකුනකි.
කුළුඳුලේ පිපී ආ මධු මල මැලැවෙයි
දොළ දිගේ ගලා ආ දිය වැල බොරවෙයි
පිදූ පාපයෙන් හද සැලමුතු පෙම
තැවෙන්නී ඈ . . . ආලයේ නාමෙන්
ඇය සත්ත්‍ය ලෙසම තම අතගත් ස්වාමියාට ප්‍රේම කරනවා වන්නට ඇත. එය හදවතේ වූ ගැඹුරුම තැනක සිට වන්නටද ඇත. නමුදු ඇය කලෙක ලදුවා වූ කැලල හමුවේ ඒ ප්‍රේමයේ පුෂ්පයට තව දුරටත් විකසිත විය හැකිද, සුනිමල දිය ලෙසින් දොල පහරක් සේ මේ මොහොත දක්වා ආ මග මංගල යහන මත බොර වී හමාරය, ඇය වරෙක සැලමුතු පෙම තුල (ප්‍රථම පෙම) කලා වූ පාපයන් නිසා ස්වාමියා ඉදිරියේ මැරි මැරී උපදින්නට තරම් කටුක චිත්ත පීඩාවකට උරුමකම් කියයි. ඇත්තෙන්ම අප මුල් බැසගත් සංස්කෘතිය තුල යුවතියකගෙන් එවන් වටිනාකම් ගිලිහුනිනම් ලබන්නට වෙන නින්දා, අවලාද කොතෙක්දැයි මා නැවත සිහි කල යුතු නැත.
ඉතින් එහෙනම් අවසරයි...!!
ගීතය වෙත...
https://www.youtube.com/watch?v=zQ48-ITh_o0
